يوميات موظفة في وسط البلد - 4

مناقشة بين ست وبنت شابة في المترو، ماكنتش مركزة بس فجأة سمعت الجملة ده من الست: "البنت ليها انها تاكل وتشرب وتنام، لكن الولد يلف ويعرف بنات عادي"! طيب يعني هو اللي هيعرفهم دول مش بنات بردو اللي كان رأيها من شوية ان دورهم في الحياة انهم ياكلوا ويشربوا ويناموا!!

بغض النظر عن نظرتها لدور البنت -العظيم- في الحياة (اعتبرت انها حرة في رأيها)، المشكلة الأكبر في التناقض، على أساس مثلا ان الكائن اللي اتكلمت عليه في الجملة اللي بعدها ان الولد عادي انه يعرفه!! والمشكلة التانية ان بنتها حوالي ١٤ سنة كده وكانت معاها وبتأكد على كلامها 

حاجة رومانسية كده في النص :)

#Love is an energy. It cannot be created or destroyed, but may be changed from one form to another :) <3 

يوميات موظفة في وسط البلد - 1

والجدير بالذكر ان الناس في وسط البلد بتمشي في مسارات، طوابير يعني، خطوة أول واحد في الطابور هي اللي بتحدد سرعته. ويا سلام بقى لو حد فكر يقف يشتري حاجة من البياعين اللي على الصفين، كلنا لازم نستناه (تكافل اجتماعي يا جماعة)، أو مثلا لو ست كبيرة أو واحدة بترغي في التليفون. ولو فكرت تطلع برة المسار يبقى انت اللي جبته لنفسك، استحمل بقى التخبيط من كل حدب وصوب ومش بعيد يتداس عليك.

الناس هنا زي الزموبيز (جمع زومبي)، لو خبطت في حد من غير قصد - غالبا بيكون حد زقني عليه - بلف عشان أقوله أسفة مابلاقيهوش، هو أصلا ماحسش بالخبطة غالبًا. وطبعًا لو حد خبطني أو داس على رجلي ولا بياخد باله وبيكمل في طريقه عادي جدًا.

Sometimes..

"Sometimes.. it's a nice feeling when you realize that all the world around you is busy and moving with the flow and you live another peaceful life and don't care of anything they do." ^_^

"Sometimes.. it's very healthy to stay away from people and live in isolated island with your family, love, books and the very close people." ^_^ <3 elHamdulellah

#peaceful
#love

ليه (ذا إكستريم)؟

أولا أنا مش كاتبة خالص ولا مدونة ولا شاطرة في الكتابة أصلا، كل الموضوع اني اكتشفت اني اكستريم، إكستريم في كل حاجة، كل حاجة بفكر فيها أو بحسها بتفضل تكبر جوايا و أفضل أغوص جوا التفاصيل بتاعتها لحد ما أجيب آخرها.. والموضوع ده هو اللي خلاني أكتب عشان بصراحة مش دايما بلاقي حد قدامي أحكيله وكمان ساعات الإكستريم ده بيكون كئيب أوي فالناس القريبين مني بيصعبوا عليا مش بحب أقوله ليهم، و اكتشفت كمان ان موضوع اني إكستريم ده هو السبب في كل مشاكلي تقريبا.. فقررت اني أكتب عشان أخرج كل حاجة و ارجع طبيعية تاني :D
لما برجع أقرأ اللي أنا كتبته بعد فترة، حاجات بحس فيها إني فعلا كنت أوفر أوي، و حاجات بحس انها حقيقة وواقع حتى لو أنا في أوقات كتير بفضّل إني أهرب منه أو أعمل نفسي مش شايفاه..
حاجة تانية بقى خلتني أعمل البلوج ده اني أحط فيه كل الحاجات اللي بتعجبني، يعني ساعات ناس بتبقى كاتبة كلام بيعجبني أوي و ببقى عايزة أحتفظ به و ممكن أشيره على الفيس بوك بس بعد فترة بيختفي وسط البوستس الكتير و بنساه. طبعًا أي حاجة هنزلها مش أنا اللي كاتباها هكتب اسم اللي كاتبها و لينك للبوست، و بصراحة مش كل مرة هستأذن صاحب البوست اني أنزله عشان هو أصلا حاطتها بابلك لأي حد يقراها، ماعدا بقى لو حد عامل برايفسي يبقى لازم أستأذنه الأول..
حاجة كمان.. غير اني بكتب عامية و ممكن يبقى في وسطها كدة لغة عربية فصحة، ساعات كمان كلمات بكتبها إنجلش، أنا عارفة انه مش صح، بس أنا بكتب اللي بييجي على بالي بالطريقة اللي جه بيها و مش براجع و لو راجعت ممكن أراجع عشان الغلطات الإملائية بس، لكن اللي جوايا عايزة أكتبه زي ما أول مرة خطر على بالي :)