أولا أنا مش كاتبة خالص ولا مدونة ولا شاطرة في الكتابة أصلا، كل الموضوع اني اكتشفت اني اكستريم، إكستريم في كل حاجة، كل حاجة بفكر فيها أو بحسها بتفضل تكبر جوايا و أفضل أغوص جوا التفاصيل بتاعتها لحد ما أجيب آخرها.. والموضوع ده هو اللي خلاني أكتب عشان بصراحة مش دايما بلاقي حد قدامي أحكيله وكمان ساعات الإكستريم ده بيكون كئيب أوي فالناس القريبين مني بيصعبوا عليا مش بحب أقوله ليهم، و اكتشفت كمان ان موضوع اني إكستريم ده هو السبب في كل مشاكلي تقريبا.. فقررت اني أكتب عشان أخرج كل حاجة و ارجع طبيعية تاني :D
لما برجع أقرأ اللي أنا كتبته بعد فترة، حاجات بحس فيها إني فعلا كنت أوفر أوي، و حاجات بحس انها حقيقة وواقع حتى لو أنا في أوقات كتير بفضّل إني أهرب منه أو أعمل نفسي مش شايفاه..
حاجة تانية بقى خلتني أعمل البلوج ده اني أحط فيه كل الحاجات اللي بتعجبني، يعني ساعات ناس بتبقى كاتبة كلام بيعجبني أوي و ببقى عايزة أحتفظ به و ممكن أشيره على الفيس بوك بس بعد فترة بيختفي وسط البوستس الكتير و بنساه. طبعًا أي حاجة هنزلها مش أنا اللي كاتباها هكتب اسم اللي كاتبها و لينك للبوست، و بصراحة مش كل مرة هستأذن صاحب البوست اني أنزله عشان هو أصلا حاطتها بابلك لأي حد يقراها، ماعدا بقى لو حد عامل برايفسي يبقى لازم أستأذنه الأول..
حاجة كمان.. غير اني بكتب عامية و ممكن يبقى في وسطها كدة لغة عربية فصحة، ساعات كمان كلمات بكتبها إنجلش، أنا عارفة انه مش صح، بس أنا بكتب اللي بييجي على بالي بالطريقة اللي جه بيها و مش براجع و لو راجعت ممكن أراجع عشان الغلطات الإملائية بس، لكن اللي جوايا عايزة أكتبه زي ما أول مرة خطر على بالي :)
